MBASHA APANDISHWA KIZIMBANI KUJIBA MASHITAKA MAWILI LIKIWEMO LA UBAKAJI

Mbasha akiwa na mkewe, Flora, wakiwa na furaha kabla ya bifu lao siku za nyuma.

**********************************************

  Na Mwandishi Wetu, Dar 

MUME wa msanii wa muziki wa Injili, nchini Flora Mbasha,  Emmanuel Mbasha (32) ambaye pia ni msanii wa muziki huo, amefikishwa katika Mahahakama  ya Wilaya ya Ilala kujibu mashitaka mawili yanayomkabili likiwemo la ubakaji.

Baada ya kufikishwa Mahakamani hapo, Mbasha ambaye pia ni mfanyabiashara, alisomewa mashitaka yake mbele ya Hakimu Mkazi Wilberforce Luago.

Wakili wa Serikali Nassoro Katuga, alidai kuwa mshtakiwa alitenda makosa hayo mawili maeneo ya Tabata Kimanga, jijini Dar es Salaam.

Katuga alidai katika shitaka la kwanza kuwa, Mei 23, mwaka huu eneo la Tabata Kimanga, Wilaya ya Ilala, jijini Dar es Salaam,  kinyume cha sheria huku akijua ni kosa alimuingilia kwa nguvu msichana anayedaiwa kuwa shemeji yake (jina limehifadhiwa).

Katika shtaka la pili, ilidaiwa kuwa Mei 25, mwaka huu eneo la Tabata Kimanga, jijini Dar es Salaam, kinyume cha sheria, mshtakiwa aliumuingilia kwa nguvu  mfanyakazi wake (jina limehifadhiwa). 

 Hata hivyo, mshtakiwa alikana mashitaka hayo .

Upande wa Jamhuri ulidai kuwa hauna pingamizi la dhamana.

Hakimu Luago alitaja masharti ya dhamana kwa mshtakiwa kuwa na wadhamini wawili, mmoja awe mtumishi wa serikali na mwingine kutoka taasisi inayotambulika watakaosaini hati ya dhamana ya Sh. milioni 5.

Mshtakiwa alishindwa kutimiza masharti ya dhamana hivyo alipelekwa rumande na kesi iliahirishwa hadi Juni 19, mwaka huu itakapotajwa.

Mbasha akiwa chini ya ulinzi wa askari polisi alisindikizwa katika basi la Jeshi la Magereza kwa ajili ya kwenda kuanza maisha mapya mahabusu ya Keko, jijini Dar es Salaam.